AE blink o' the bonnie new mune,
  Ay tinted(1) as sune as she's seen,
Wad licht me to Meg frae the toun,
  Tho' mony the braeside between;
Ae fuff o' the saftest o' win's, 
  As willyart it kisses the thorn,
Wad blaw me o'er knaggies an' linns
  To Meg by the side o' the burn!

My daddie's a laird wi' a ha';
  My mither had kin at the court;
I maunna gang wooin' ava',
  Or ony sic frolicsome sport.
Gin I'd wed, there's a winklot kept bye,
  Wi' bodles an' gear i' her loof--
Gin ony tak her an' her kye,
  He'll glunsh(2) at himsel' for a coof.

My daddie's nae doyt, tho' he's auld,
  The winklot is pawkie an' gleg;
When the lammies are pit i' the fauld,
  They're fear'd that I'm aff to my Meg.
My mither sits spinnin'--ae blink
  O' a smile in her kind, bonnie ee;
She's minded o' mony a link
  She, stowlins, aft took ower the lea

To meet wi' my daddie himsel',
  Tentie jinkin' by lea an' by shaw;
She fu's up his pipe then hersel',
  That I may steal cannie awa'.
O leeze me o' gowany swaird,
  An' the blink o' the bonnie new mune!
An' the cowt stown out o' the yaird
   That trots like a burnie in June!

My Meg she is waitin' abeigh--
  Ilk spunkie that flits through the fen
Wad jealously lead me astray
  Frae my ain bonnie lass o' the glen.
My forbears may groan i' the mools,
  My daddie look dour an' fu' din;
Wee Love is the callant wha rules,
  An' my Meg is the wifie I'll win.

(1) Tinted--lost.
(2)  Glunsh--frown.